Հայաստանը չպետք է զարգացում ակնկալի Թուրքիայի հետ հարաբերություններում. ՀԴԿ նախագահ

Եթե մենք հայ-թուրքական հարաբերությունները կապում ենք ղարաբաղյան հիմնահարցի հետ, ապա մենք ի սկզբանե տանուլ ենք տվել, այսօր հայտարարել է Հայաստանի դեմոկրատա-կան կուսակցության նախագահ Արամ Սարգսյանը:

«Հայկական կողմը ճիշտ է անում, երբ ասում է, որ որևէ նախապայման չպետք է լինի հայ-թուրքական հարաբերություն-ների զարգացման մեջ»,-ընդգծել է նա: Խոսելով Հայաստանի և Թուրքիայի միջև հարաբերությունների զարգացման նախադրյալների մասին` Սարգսյանը հավաստիացրել է, որ չարժե ակնկալել դրանց կարգավորումը, նույնիսկ եթե այդ հարաբերությունները շաղկապվեն ղարաբաղյան հակամարտության հետ:

«Թուրքիայի հետաքրքրությունն այս գործընթացի նկատմամբ սառչել է ոչ թե ադրբեջանցիների պատճառով, այլ որովհետև Եվրոպան մերժեց դրա մուտքը ԵՄ»,- նշել է ՀԴԿ նախագահը:

Շոշափելով նաև Հայաստանի նախագահի հնարավոր այցը Թուրքիա՝ Սարգսյանը հայտարարել է, որ «կարելի է գնալ զուտ ֆուտբոլի խաղը դիտելու, ինչպես պարոն Գյուլն արեց` որևէ բանակցությունների ակնկալիք չունենալով»:

«Մյուս կողմից, հաշվի առնելով թուրքական կողմի կեցվածքը, որը խախտել է ձեռք բերված պայմանավորվածությունները և ժամկետները, նախագահը բոլոր իրավունքներն ունի ասելու՝ «Շնորհկալ եմ, բայց ես չեմ գալիս»». հավելել է Սարգսյանը:

Թերթ.am

Շարունակել կարդալ >>>
Leer mas >>>

Ուկրաինայում թողարկվել է «Սուրբ Խաչ» արծաթե հուշադրամ

Այս տարի նշվում է Ղրիմում գտնվող հայկական «Սուրբ Խաչ» վանքի 650-ամյակը, ինչի կապակցությամբ Ուկրաինայի ազգային բանկը «Ուկրաինայի ճարտարապետական կառույցներ» հուշադրամների շարքի շրջանակում թողարկել է արծաթե հուշադրամ՝ նվիրված XIV-րդ դարում հիմնադրված հայկա-կան «Սուրբ Խաչ» վանքին:

Հուշադրամի դիմերեսին պատկերված է վանքի տարածքում տեղակայված Խաչքարը, իսկ դարձերեսին պատկերված են վանական շինությունները. ձախ կողմում՝ «Հին Ղրիմ հայկական վանքը» (XIV-րդ դար) և աջ կողմում՝ «Սուրբ Խաչ» վանքը:

Հատկանշականն այն է, որ առաջին անգամ արտերկրի կողմից իրականացվել է Հայաստանի պատմությանը և հայկական մշակույթին նվիրված հուշադրամի թողարկում: «Սուրբ Խաչ» արծաթե հուշադրամ ձեռք բերել ցանկացողները կարող են դիմել ՀՀ կենտրոնական բանկի «Դրամագետ» վաճառասրահ: Այս մասին հաղոդրում են ՀՀ ԿԲ-ից;

Թերթ.am

Շարունակել կարդալ >>>
Leer mas >>>

Կալիֆորնիայի դատարանի վճիռը վտա՞նգ է Հայոց ցեղասպանության ճանաչմանը. Մանոյան

Դաշնակցության Հայ դատի և քաղաքական հարցերով գրասենյակի պատասխանատու Կիրո Մանոյանն այսօր «Դե ֆակտո» մամուլի ակումբում մեկնաբանել է Կալիֆորնիայի վերաքննիչ դատարանի՝ օգոստոսի 20-ին կայացրած վճռի հետևանքները:

Մանոյանը նշել է, որ Կալիֆորնիայի դատարանը մերժել է գերմանական 3 ընկերություններից մեկի հայցը՝ Հայոց ցեղասպանության հետնորդներին փոխհատուցում տալու վերաբերյալ, մինչդեռ քաղաքային դատարանը նախկինում բավարարել է «Նյու Յորք Լայֆ ինշուրընս» և «Աքսա» ապահովագրական ընկերությունների նույնաբովանդակ հայցերը

Կալիֆորնիայի դատարանը մերժել է գերմանական ընկերության հայցը՝ պատճառաբանելով, որ եթե ԱՄՆ-ն պաշտոնապես չի ճանաչել Հայոց ցեղասպանությունը, որևէ նահանգ չի կարող ԱՄՆ նախագահի արտաքին քաղաքականությանը հակառակ քայլ կատարել: Մինչդեռ, ըստ Մանոյանի, դատարանի վճիռը լավ հիմնավորված չէ, քանի որ ԱՄՆ-ում չկա որևէ օրենք, որը պարտադրում է՝ որ եթե նախագահը չի ընդունել Հայոց ցեղասպանությունը, Նահանգները չեն կարող որոշում ընդունել:

«Եթե այս վճիռն անփոփոխ մնա, վճիռը թուրքական շրջանակների կողմից վստահաբար օգտագործվելու է, որպեսզի մնացած բոլոր Նահանգների կողմից ճանաչումները փորձեն դատական վճռով չեղյալ համարել, հակասահմանադրական համարել և նույնիսկ այս վճռի հիման վրա կարելի է ԱՄՆ Կոնգրեսին արգելել որևէ բանաձև որդեգրել, որտեղ Հայոց ցեղասպանությունը կճանաչվի»,- վճռի հետևանքներից ամենավատի մասին ահազանգել է Կիրո Մանոյանը:

Շարունակելով, սակայն, դաշնակցական գործիչն ասել է, որ ելքեր կան՝ նախ կարելի է հայցը բողոքարկել՝ հատկապես, որ դրա իրավական հնարավորությունը կա, հետո նաև՝ հետամուտ լինել, որ այդ վճիռը չդառնա նախադեպային որոշում:

Կալիֆորնիայի դատարանի վճռի կայացման հետևում Կիրո Մանոյանը թուրքական լոբբիի ազդեցությունն անուղղակի է համարում, բայց նաև տեղեկություն ունի, որ Կալիֆորնիայում Թուրքիայի դեսպանատունը նամակով դիմել է դատարանին: Ընդհանուր առմամբ, նա չի բացառել նաև, որ թուրքական կողմը հարցի առնչությամբ ճնշում է գործադրել անգամ ԱՄՆ կոնգրեսականների վրա:

Թերթ.am

Շարունակել կարդալ >>>
Leer mas >>>

Նոր բացահայտումներ հեթանոսական տաճարի պեղումների արդյունքում

Այս օրերին Ախուրյան գետի վերին ավազանում՝ Ամասիա քաղաքից ոչ հեռու, ընթանում են Հողմիկի հեթանոսական տաճարական համալիրի պեղումները, որոնք իրականացնում է ՀՀ ԳԱԱ Հնագիտության և ազգագրության ինստիտուտի արշավախումբը՝ պատմական գիտությունների թեկնածու, պրոֆեսոր Հայկ Հակոբյանի գլխավորությամբ։

Ինչպես Tert.am-ի հետ զրույցում նշեց Հայկ Հակոբյանը, տվյալ հնավայրի պեղումներն ունեն բացառիկ նշանակություն՝ իմաստավորելու համար հայ հեթանոսական մշակույթը, մասնավորապես՝ կրոնը, պաշտամունքային ճարտարապետությունն ու հոգևոր Հայաստանը։

Պատմաբանի խոսքերով՝ մինչև վերջին տասնամյակները հին Հայաստանի տաճարների մասին խոսելիս հիմնականում ներկայացվում էր Գառնիի հեթանոսական տաճարը, որը հայոց հողի վրա կառուցված հունա-հռոմեական ստեղծագործություն է։

«Հայ վաղ միջնադարյան պատմիչների մի մասը՝ Ագաթանգեղոս, Խորենացի, շատ ժլատ ակնարկում են հեթանոսական մեհյանների մասին։ Այս անունը նրանք ստացել են Միհրի անունից։ Սակայն մինչև վերջերս պարզ չէր, թե հին Հայաստանի այդ տաճարներն ինչպիսի հորինվածք ունեն»,– տեղեկացրեց Հայկ Հակոբյանը։

Նրա խոսքերով՝ ներկա դրությամբ Հողմիկի հնավայրում պեղված է մոտավորապես 50 սրահ, սենյակ, պահեստային շինություններ, որոնց մեջ գտնվում են զոհաբերված կենդանիների մնացորդներ, զոհասեղաններ, արձանիկներ, նշանագրված քարից նմուշներ։ Սակայն ամենահարուստ նյութը խեցեղենն է, որի օգնությամբ հնարավոր է թվագրել հնավայրի տարբեր շերտերը։

Դատելով պեղումների արդյունքներից՝ հնավայրը գործել է մոտ 400 կամ ավելի տարի։ Մ.թ.ա. 2-րդ դարից մինչև մ.թ. 3-րդ դարի վերջը, երբ Քրիստոնեությունն ընդունվեց որպես պետական կրոն։

Որոշ սենյակներում բացվում են միմյանց հաջորդող երեք կամ նույնիսկ չորս հատակներ, որոնց վրա գտնվում է տարբեր տիպի խեցեղեն և տաճարական գույք՝ քուրմերի համար ածելիներ, կենդանիների վերջույթները հատելու համար կացիններ, դեղագործական չափումներ անելու համար նախատեսված կավից սրվակներ և այլն։

Նշենք, որ արշավախմբի աշխատանքներին մասնակցում են գիտնականներ և ուսանողներ ԵՊՀ-ից։ Պեղումները շարունակական են, քանի որ համալիրն ունի մոտ 300 մ լայնություն և մոտ կես կմ երկարություն։ Այն բաղկացած է շենքերից, որոնք բաժանվում են միմյանցից փողոցներով։

Թերթ.am

Շարունակել կարդալ >>>
Leer mas >>>

Շրթներկը կօգնի պայքարել ավելորդ քաշի դեմ

Մեծ Բրիտանիայում վաճառքի է հանվել շրթներկ, որի օգնությամբ կանայք կարող են ազատվել հավելյալ յուղաշերտերից։ Շրթներկ արտադրող ընկերությունը խոստանում է, որ դրա օգնությամբ կանայք այլևս չեն ցանկանա չարաշահել շոկոլադը կամ պաղպաղակը։ Այդ մասին հաղորդում է mignews.com-ը։

Burner Balm բալզամի գինը 10 դոլար է. շրթներկի բաղադրիչներն են յուղը, կոֆեինը և կանաչ թեյը։ Բալզամը պետք է օգտագործել օրական առնվազն վեց անգամ։

Արտադրող ընկերությունը նշում է, որ կանայք պետք է օգտագործեն շրթներկն ամեն անգամ, երբ զգան սնվելու կարիքը։

Նշենք, որ առողջ ապրելակերպի և ճիշտ սննդակարգի բազմաթիվ ասոցիացիաներ արդեն դեմ են դուրս եկել Burner Balm ընկերությանը՝ պնդելով, որ այն նվաստացնում է գեր կանանց։


Tert.am

Շարունակել կարդալ >>>
Leer mas >>>

Ֆինանսական ճգնաժամն ազդում է նաև մոլախաղերի վրա

Համաշխարհային ֆինանսական ճգնաժամն ապացուցեց, որ մոլախաղերի սիրահարներն անուղղելի չեն։ Աշխարհի խոշորագույն խաղասրահների եկամուտները նվազում են, իսկ ընդլայնման ծրագրերը՝ գրվում սառույցին։ Las Vegas Sands-ը՝ շուկայական արժեքով աշխարհում խաղասրահների երկրորդ խոշորագույն օպերատորը, Citigroup-ի հետ փորձում է վերանայել Մակաոյում նոր խաղասրահների կառուցման ֆինանսավորման պայմանները։ Հիշեցնենք, որ օգոստոսին Las Vegas Sands-ը հայտարարեց, թե 5,25 մլրդ դոլարի վարկի համար պատրաստ է հինգ տարվա փոխառնությունների չափանիշային տոկոսադրույքից 3,5%-ով ավելի վճարել։ Las Vegas Sands-ի ներքին խոհանոցին քաջատեղյակ մարդկանց տեղեկացմամբ՝ խաղասրահների օպերատորը ներկայում ստիպված է լինելու կա՛մ նվազեցնել վարկի ժամկետը, կա՛մ ավելի բարձր տոկոս վճարել։Ընդհանուր առմամբ, ընկերությունները Մակաոյում՝ Չինաստանում մոլախաղերի միակ օրինական կենտրոնում, ծրագրում են շուրջ 25 մլրդ դոլար ներդնել։ Սակայն համաշխարհային ֆինանսական ճգնաժամի արդյունքում բանկերը վախենում են ֆինանսավորել վերջիններիս ընդլայնման ծրագրերը, ինչի արդյունքում աճում են վարկավորման տոկոսադրույքները։ Մյուս կողմից՝ Մակաոյի եկամուտների վրա բացասական ազդեցություն են թողնում Չինաստանի սահմանափակումները տարածաշրջան այցելուների նկատմամբ։


«Կապիտալ» օրաթերթ

Շարունակել կարդալ >>>
Leer mas >>>

Տաքսու վարորդը տեղափոխել է սեփական տան գողին

Չինական Հուայնան քաղաքի տաքսու վարորդը դարձել է իր սեփական տունը կողոպտած հանցագործի ակամա գործընկերը: Տաքսու վարորդն օգնել է գողին բեռնել գողոնը մեքենայի մեջ և տեղափոխել է հանցագործին, հայտնում է Ananova-ն:

Բացատրելով, թե ինչու նա այդքան շատ իրեր ունի` հանցագործը պատմել է տաքսու վարորդին, որ ինքը նոր է վերաադարձել գործուղումից հայրենի քաղաք: Տաքսու վարորդը նշել է, որ, օգնելով ուղևորին բեռնել իրերը, նա նկատել է իրերի մեջ անպոչ ձուկ՝ճիշտ այպիսին, ինչպիսին նա ուներ իր սառնարանում:
Չինացու մտավախություններն արդարացվել են, երբ նա վերադարձել է տուն և հայտնաբերել, որ իր տուն գող է մտել, որը գողացել է անգամ վերոնշյալ ձուկը:

Արդյունքում՝ ոստիկանությանը հաջողվել է ձերբակալել հանցագործին: Նրան արդեն մեղադրանք է ներկայացվել:


Tert.am

Շարունակել կարդալ >>>
Leer mas >>>