Անգոլայի մայրաքաղաքը ճանաչվել է աշխարհի ամենաթանկ քաղաք

Անգոլայի մայրաքաղաք Լուանդան ճանաչվել է աշխարհի ամենաթանկ քաղաքը: Կյանքն այդ քաղաքում երբեք էժան չի եղել, սակայն վերջերս Անգոլայի մայրաքաղաքը առաջ է անցել նույնիսկ Տոկիոյից: Այդ մասին ասված է Լոնդոնի ECA International խորհրդատվական ընկերության կողմից հրապարակված հետազոտության մեջ:
Ինչպես հաղորդում է ИТАР-ТАСС-ը, Լուանդայում ապրանքների և ծառայությունների անհամեմատ բարձր գների հիմնական պատճառը քաղաքի նավահանգստում բեռների վերամշակման հետ կապված բարդություններն են, ինչպես նաև ենթակառուցվածքը, որը գրեթե ամբողջովին քայքայվել է երեք տասնամյակ տևած քաղաքացիական պատերազմների հետևանքով:
Աներևակայելի շահույթները, որոնք օտարեկրյա ընկերությունները ստանում են Անգոլայում նավթի և ադամանդների արդյունահանման հաշվին, բարձրակարգ տների, թանկարժեք մեքենաների, ռեստորանների, հագուստի և կոշկեղենի բարձր պահանջարկ են ստեղծում: Սակայն Անգոլայի բնակիչների մեծ մասը ապրում է ծայրահեղ աղքատության պայմաններում:
Կաթի մեկ լիտրը կարող է արժենալ երեք դոլար, երկուսենյականոց բնակարանի ամսեկան վարձը` 7 հազ. դոլար։ Հարկ է նշել, որ Լուանդայի ենթակառուցվածքները նախատեսված են 500 հազ. մարդու, սակայն այժմ բնկաչությունը ներգաղթյալների հաշվին կազմում է 5 մլն մարդ:


Tert.am