Թուրք նախարարը ցանկանում է Հրանտ Դինքի անունով դպրոց կոչել

Թուրքիայի կրթության նախարար Նիմեթ Չուբուքչուն ցանկություն է հայտնել երկրի դպրոցներից մեկը կոչել «Ակօս» շաբաթաթերթի խմբագրապետ Հրանտ Դինքի անունով։ Այս մասին թուրքական Zaman օրաթերթի հետ հարցազրույցում ասել է թուրք նախարարը։
Ի պատասխան Zaman-ի այն հարցին, թե «ինչպե՞ս եք վերաբերվում այն հնարավորությանը, որ Թուրքիայի դպրոցներից մեկը կոչվի խտրականության զոհ դարձած Հրանտ Դինքի անունով», Չուբուքչուն հայտարարել է. «Շատ լավ կլինի և, բնականաբար, նման բան կարող է լինել։ Հրանտը մի մարդ էր, ում ես շատ էի սիրում, և որի կորուստն ինձ մեծ ցավ պատճառեց։ Կարծում եմ, որ դա մեծ կորուստը էր նաև Թուրքիայի համար։ Իհարկե, ինչու չէ… Շատ լավ միտք է։ Եթե նման բան տեղի ունենա, դպրոցի բացումը միասին ենք անելու»,- հայտարարել է Թուրքիայի կրթության նախարարը։Հիշեցնենք, որ անցած տարի Ստամբուլի քաղաքապետարանը մերժեց «Ակօս» շաբաթաթերթի խմբագրատան հարևանությամբ գտնվող Շաֆաք փողոցը վերանվանել Հրանտ Դինքի անունով։



Թերթ.am

Շարունակել կարդալ >>>
Leer mas >>>

Երաշխիքների ետևից Շվեյցարիա մեկնող թուրք դիվանագետին կարող են ձերբակալել. Referans

Թուրքական Referans թերթը, անդրադառնալով պաշտոնական Անկարայի՝ հայ-թուրքական Արձանագրությունների վերաբերյալ Հայաստանի Սահմանադրական դատարանի կայացրած որոշման առնչությամբ իր մտահոգությունները հայտնելու և երաշխիքներ ստանալու համար Շվեյցարիա դիվանագետ գործուղելու որոշմանը, գրում է, որ այս ուրբաթ Բեռն մեկնող Թուրքիայի արտգործնախարարության խորհրդական Ֆերիդուն Սինիրլիօղլուին հնարավոր է՝ ձերբակալեն Շվեյցարիայում։Իր այս տեսակետը թուրքական պարբերականը հիմնավորում է Շվեյցարիայում գործող Հայոց ցեղասպանության փաստի ժխտումը քրեականացնող օրենքով և Սինիրլիօղլուի՝ Բեռն կատարելիք այցի վերաբերյալ ներկայացնում է իր սցենարը.
«Մի պահ պատկերացնենք՝ Սինիրլիօղլուն հասել է Շվեյցարիա, և նրան դիմավորում են լրագրողները։ Երբ նրան հարցնեն այցելության նպատակի մասին, հավանաբար Սինիրլիօղլուն կտա հետևյալ պատասխանը. «Ինչպես գիտեք, Շվեյցարիան որպես միջնորդ է հանդես եկել Հայաստանի և Թուրքիայի միջև Արձանագրությունների ստորագրման հարցում։ Սակայն Հայաստանի Սահմանադրական դատարանի որոշմամբ արգելակվեց այդ գործընթացը։ Մենք Շվեյցարիա ենք ժամանել գործընթացի շարունակման համար երաշխիքներ ստանալու նպատակով»։ Մի լրագրող էլ եթե հարցնի. «Իսկ ինչպիսի՞ երաշխիքներ եք ուզում», թուրք դիվանագետը կպատասխանի. «ՍԴ որոշումն իրավական խոչընդոտ է ստեղծում հարաբերությունների կարգավորումից հետո ձևավորվելիք պատմաբանների հանձնաժողովի կողմից Ցեղասպանության հարցի քննարկման համար։ Ըստ մեզ՝ Ցեղասպանություն չի եղել, սակայն պատրաստ ենք քննարկել հակառակ կողմի տեսակետը։ Սակայն եթե հայկական կողմը հայտարարի, թե դրա հետ կապված քննարկումներին դեմ է, այդ ժամանակ անիմաստ կդառնա հանձնաժողովի ձևավորման նպատակը, կխցանվի նաև երկու երկրների միջև հարաբերությունների կարգավորման գործընթացը։ Դա կանխելու նպատակով Շվեյցարիայից իրավական գրավոր երաշխիք ենք ուզում՝ Ցեղասպանության պնդումները հանձնաժողովում առանց կանխակարծության քննարկելու առնչությամբ»»։

Referans-ը գրում է, որ նման արտահայտություններից հետո մեծ է հավանականությունը, որ Սինիրլիօղլուի դեմ շվեյցարական արդարադատությունը կսկսի հետաքննություն Հայոց ցեղասպանության փաստը ժխտելու մեղադրանքով։
«Իսկ եթե Սինիրլիօղլուի այդ հայտարարություններն ուղիղ եթերով լսի մի դատախազ, նրա դեմ, Շվեյցարիայի օրենքների համաձայն, հետաքննություն կսկսվի ցեղասպանությունը ժխտելու մեղադրանքով։ Սակայն քիչ հավանական է, որ Սինիրլիօղլուն նման հայտարարություններ անի լրագրողների հետ հանդիպման ժամանակ։ Բայց այս սցենարն այնքան էլ իրականությունից հեռու չէ։ Հարկ է հիշել միայն ցեղասպանության ժխտման համար Շվեյցարիայում դատապարտված երեք թուրք քաղաքացիներին»,- նշում է թուրքական պարբերականը։

Թերթ.am

Շարունակել կարդալ >>>
Leer mas >>>

Ամերիկայում թուրքական կազմակերպություններն ընդլայնում են հակահայկական քարոզչությունը

Ամերիկայում թուրքական կազմակերպությունները նախապատրաստական աշխատանքներ են սկսում ԱՄՆ-ի Կոնգրեսում Հայոց ցեղասպանության վերաբերյալ բանաձևի հնարավոր ընդունումը կասեցնելու համար։ Ինչպես հաղորդում է Ankara գործակալությունը, Նյու Յորքում հայտարարությամբ հանդես են եկել Ամերիկայի թուրքական կոալիցիայի, Թուրք-ամերիկյան միությունների դաշնության և Թուրքական մշակույթի հիմնադրամի նախագահները՝ խոսելով իրենց հետագա ծրագրերի մասին։
Հայտարարության համաձայն՝ ԱՄՆ-ում գործող թուրքական հասարակական կազմակերպությունները պատրաստվում են իրենց ուժերը համախմբել ընդդեմ Հայոց ցեղասպանության ճանաչման և այդ նպատակով տարբեր հանդիպումներ են ունենալու կոնգրեսականների հետ, ինչպես նաև ճանաչողական և քարոզչական աշխատանքներ են իրականացնելու ամերիկաբնակ թուրքերի շրջանում։


Թերթ.am

Շարունակել կարդալ >>>
Leer mas >>>

Կոնգրեսի կողմից Հայոց ցեղասպանության ճանաչումը ձեռնտու է Թուրքիային. ադրբեջանցի խորհրդարանական

ԱՄՆ Կոնգրեսի կողմից Հայոց ցեղասպանության փաստի ճանաչումն օգտակար կլինի Թուրքիայի համար։ Այս մասին Day.az-ին տված հարցազրույցում հայտարարել է Ադրբեջանի խորհրդարանի պատգամավոր Գուդրատ Հասանգուլիևը։

«Ամերիկյան կոնգրեսը Հայոց ցեղասպանության հարցով մշտապես շանտաժի է ենթարկում Անկարային։ Այդ կերպ նրանք ցանկանում են վերահսկել Թուրքիայի արտաքին քաղաքականությունը։ Բնականաբար, առկա է Կոնգրեսի կողմից նման բանաձևի ընդունման հնարավորությունը, սակայն դա քիչ է հավանական, քանի որ այդպիսի որոշմամբ վերջ կդրվեր թուրք-ամերիկյան ռազմավարական հարաբերություններին»,- ասել է ադրբեջանցի խորհրդարանականը։
Գասանգուլիևը կարծիքով՝ Կոնգրեսի կողմից ցեղասպանության ճանաչմամբ Թուրքիան լիովին կազատվի ամերիկյան վերահսկողությունից. «Կարծում եմ, որ եթե Կոնգրեսը ճանաչի Ցեղասպանությունը, Անկարան կազատվի Վաշինգտոնի շանտաժներից և կկարողանա իրականացնել ավելի ազատ արտաքին քաղաքականություն»,- ասել է Գասանգուլիևը։

Թերթ.am

Շարունակել կարդալ >>>
Leer mas >>>

ԵԱՀԿ Մինսկի խումբը լրջորեն թերացել է իր պարտականություններում. Էրդողան

Մենք պատրաստ ենք հայ-թուրքական հարաբերությունների կարգավորման գործընթացը շարունակել ըստ «ճանապարհային քարտեզի»: Այս մասին Թուրքիայի հանրային հեռուստատեսությամբ հայտարարել է երկրի վարչապետ Ռեջեփ Թայիփ Էրդողանը` ի պատասխան Հայաստանի Սահմանադրական դատարանի` Արձանագրությունների վերաբերյալ կայացրած որոշման առնչությամբ լրագրողների հարցին:

Նշելով, թե գործընթացում առկա է «անառողջ մոտեցում»` Թուրքիայի վարչապետնընդգծել է, որ հայկական կողմը պետք է վերանայի հարցի առնչությամբ իր դիրքորոշումը։ Նա հայտարարել է նաև, որ թուրքական կողմը շարունակում է իրականացնել Արձանագրությունների հետ կապված իր խոստումները:
«Ներկա պահին մենք իրականացրել և շարունակում ենք իրականացնել կողմերի միջև ստորագրված համաձայնագրի հետ կապված մեր խոստումները: Գոյություն ունի փոխադարձաբար հստակեցված ժամանակացույց և «ճանապարհային քարտեզ»: Հարաբերությունների կարգավորումը շարունակվելու է ըստ «ճանապարհային քարտեզի»: Մենք միշտ պատրաստ ենք դրան և անկեղծ ենք: Մեր ճանապարհը շարունակելու ենք նույն ձևով»,- հայտարարել է Թայիփ Էրդողանը:

Թուրքիայի վարչապետը խոսել է նաև ղարաբաղյան հիմնախնդրի մասին` ընդգծելով, որ ԵԱՀԿ Միսկի խումբը 20 տարվա ընթացքում որևէ լուրջ քայլ չի արել խնդրի հանգուցալուծման ուղղությամբ:

«ԵԱՀԿ Մինսկի խումբը լրջորեն թերացել է իր պարտականություններում: 20 տարվա ընթացքում գործընթացում տեղաշարժեր չեն գրանցվել... Չեն վերացել մտահոգությունները ոչ մեր և Հայաստանի, ոչ էլ Հայաստանի և Ադրբեջանի միջև: Եթե նրանք ասեին, թե «դա այդպես պետք է լինի», Հայաստանը վերջ կդներ բռնազավթմանը: Իսկ դրանից հետո այդպիսի խնդիր չէր լինի: Սակայն Ռուսաստանը, Ամերիկան և Ֆրանսիան չգործադրեցին ակնկալվող ջանքերը: Մոտենում է ապրիլը:

Նրանց էլ ենք ասել` ինչպիսի խորհրդարան դուք ունեք, նույնպիսին ունենք մենք: Մենք որևէ բան չենք պարտադրում մեր խորհրդարանին: Ինչպիսի որոշում էլ այն կայացնի, մեզ համար ընդունելի է»,- նշել է Թուրքիայի վարչապետը:

Թերթ.am

Շարունակել կարդալ >>>
Leer mas >>>

Թուրքիայի ղեկավարները ներքին տարաձայնություններ ունեն. Իսկանդարյան

Հայաստանում Թուրքիան հաճախ ներկայացվում է որպես մենասյուն, որպես միասնական քաղաքական սուբյեկտ, որն ընդունում է կամ չի ընդունում ինչ-որ որոշում: Ելնելով այդ տրամաբանությունից` ստացվում է, որ Թուրքիայի պաշտոնյաների հայտարարությունները համաձայնեցված են, դրանք միասնական ռազմավարության մաս են: Սակայն Կովկասի ինստիտուտի տնօրեն, քաղաքագետ Ալեքսանդր Իսկանդարյանն այլ կարծիքի է:Ինչպես այսօր նշեց քաղաքագետը, «Հայաստանի հետ փոխհարաբերությունների հարցն արդեն դարձել է Թուրքիայի համար ներքաղաքական խնդիր: Այդ հարցի շուրջ թուրք քաղաքական գործիչները վիճում և ընդդիմանում են միմյանց»: Այս առումով նա մատնանշեց վարչապետ Ռեջեփ Թայիփ Էրդողանի և արտգործնախարար Ահմեթ Դավութօղլուի հակասությունը:

«Էրդողանը բավականին պոպուլիստական բնույթի քաղաքական գործիչ է: Դավութօղլուն ցանկանում է, որպեսզի հայ-թուրքական գործընթացն ավարտվի Արձանագրությունների ստորագրմամբ: Իսկ Էրդողանը կարող է օգտագործել հայ-թուրքական գործընթացը հաղթաթղթեր շահելու համար. նա կարող է պայքարել Թուրքիայի արտաքին գործերի նախարարի դեմ»,- նշեց նա:

Ըստ Իսկանդարյանի` հնարավոր են հետևյալ սցենարները. վարչապետն ընդդիմանում է նախագահին կամ վարչապետն ընդդիմանում է արտգործնախարարին:
Թերթ.am

Շարունակել կարդալ >>>
Leer mas >>>

Եվրոպացիները կհամտեսեն քառակուսի ձմերուկներ

Փետրվարի 1-ից Պանաման կսկսի քառակուսի ձմերուկներ արտահանել եվրոպական մի շարք երկրներ: Մոտ ապագայում այդպիսի ձմերուկներ հնարավոր կլինի համտեսել Բելգիայում, Մեծ Բրիտանիայում, Գերմանիայում և Հոլանդիայում, որտեղ մեծ պահանջարկ կա, ինչպես պնդում են տարօրինակ ձևերի ձմերուկների արտահանմամբ զբաղվող Fruit Producers ընկերության ներկայացուցիչները: Այս մասին հաղորդում է rbc-ն:Քառակուսի ձմերուկների աճեցման տեխնոլոգիան ծնվել է Արևելքում: Ճապոնացիների մտքով անցել էր տեղադրել ձմերուկները և սեխերը ապակե տարաների մեջ այն ժամանակ, երբ դրանք դեռ գտնվում են հասունացման փուլում: Հետագայում դրանք ձեռք են բերում արկղի ձև, ինչի շնորհիվ հեշտ փաթեթավորվում և պահվում են սառնարանում:

Նորարության գինը բավական բարձր է. օրինակ` Միացյալ Նահանգներում 6 կգ քաշով ձմերուկն արժե մոտ 75 դոլար:

Շարունակել կարդալ >>>
Leer mas >>>