Բազմաթիվ հարցադրումներ մնացին անպատասխան

Աժ-ում հայ-թուրքական հարաբերությունների եւ արձանագրությունների քննարկումը տեւեց ուղիղ 7 ժամ, որի կեսից ավելին Էդվարդ Նալբանդյանը չէր մասնակցում, մի մասում ընդհանրապես ԱԳՆ-ից ներկայացուցիչ չկար:

Այսինքն, լսումների սկզբում արված հայտարարությունը,թե նախարարը վերջում կպատասխանի հարցադրումներին, ըստ էության չէր համապատասխանում իրականությանը, քանի որ վերջում նախարարը դիվանագիտորեն պատասխանեց միայն մի քանի հարցի: Բանավոր փաստարկները, ելույթներում հնչած մտահոգություններն ըստ էության մնացին անպատասխան. Իսկ հարցերի մի տրցակի էլ Նալբանդյանը չպատասխանեց' պատճառաբանելով, որ ձեռագրերը «ռասշիֆրովկա է» պետք անել: Նալբանդյանը հեռակա կարգով պատասխանեց նաեւ Վարդան Օսկանյանի այն հայտարարությանը, թե օրինակ' մենք մինչ օրս չենք ճանաչել ասենք Վրաստանի սահմանները: «Բայց դա այդպես չէ»,- ասաց նախարարը' չմանրամասնելով, թե «ինչպես է»: «Դա չի համապատասխանում իրականությանը, չի կարելի այդպես, պետք է ավելի ուշադիր լինել»,- զգուշացրեց գործող ԱԳ նախարարը նախկին նախարարին:



Պատասխանելով հարցին, թե ով է նախաձեռնել հայ-թուրքական հարաբերությունների վերականգնման գործընթացը եւ ով է արձանագրությունների հեղինակը, Նալբանդյանը պատասխանեց, որ հայկական կողմը: Եվ զարմացավ, թե ինչ թերահավատություն կա մեր ուժերի նկատմամբ:
Նախարարը կրկին ու կրկին հայտարարեց, որ փաստաթղթում չկա որեւէ ակնարկ Ղարաբաղի կամ ցեղասպանության մասին եւ այդպիսի վտանգ չկա:

Ի դեպ, նախարարի պարզաբանումների պատճառով, որոնցում ոչ մի նոր միտք չհնչեց, ելույթ ունենալու իրավունքից զրկվեցին մի քանի տասնյակ մարդիկ, ակադեմիկոս Լենսեր Աղալովյանը, ֆիզիկոս Սիմոն Կամսարականը եւ այլն:

Վերջինիս նյարդերն, ի դեպ, տեղի էին տալիս եւ մի քանի անգամ ստիպված առանց միկրոֆոնի հենց տեղից պատասխանեց նախարարին, իսկ նիստը վարողի դիտողություններին, թե չի կարելի պատասխանեց. «2 անգամ 2-ը հավասար է 4-ի, եւ թող մեզ չհամոզեն, որ հավասար է 6-ի»:

Այնուհետեւ լրագրողների հետ զրույցում Կամսարականը հայտարարեց. «Ինչպես անվանել եթե ոչ հանցագործություն, նախարարի գործողությունները, որ չարաշահում է պաշտոնական լիազորությունները եւ Հայաստանի ու Թուրքիայի միջեւ իսկական պայմանագիրն անվանում է ընդամենը արձանագրություն»: Կամսարականը հանցագործություն է համարում եւ այն փաստը, որ Նալբանդյանը հայտարարում է, թե այդ փաստաթղթերում չի խոսվում Կարսի պայմանագրի եւ Հայոց ցեղասպանության մասին: «Այն, որ ուղղակիորեն այդ մասին գրված չէ, չի նշանակում, որ չկա: Փաստաթղթերի դրույթները հստակ ապացուցում են այն, ինչ ասված էր Կարսի պայմանագրով»,- ընդգծեց նա՝ հավելելով, որ ի տարբերություն Վրաստանի եւ Ադրբեջանի, Հայաստանը անկախություն ստանալուց հետո չի վավերացրել այդ պայմանագիրը:

Նրա խոսքերով, սուտ է նաեւ այն, որ Հայաստանի եւ Թուրքիայի միջեւ սահմանների վերաձեւման հարց չկա, քանի որ սահմանները գծվել են ԽՍՀՄ-ի եւ Թուրքիայի միջեւ, իսկ Հայաստանը Հայկական ԽՍՀ իրավահաջորդն է: Կամսարականը հիշեցրեց, որ 1991թ. օգոստոսի 23-ին ընդունված Անկախության մասին հռչակագրում դա չկա, իսկ Կարսի պայմանագիրը դադարել է գործել 1922թ. դեկտեմբերի 30-ից՝ ԽՍՀՄ ստեղծման մասին պայմանագրի ստորագրումից հետո:

Աղբյուրը. Ա1+

Շարունակել կարդալ >>>
Leer mas >>>

«ՀՀ անվտանգությունը կազինո չի»

«Հայաստանի անվտանգությունը կազինո չի, որ այսօր տանուլ տաս, վաղը փողդ հետ բերես»,-այսօր ԱԺ կազմակերպած ՙՆախաստորագրված արձանագրությունները եւ Հայաստան-Թուրքիա հարաբերությունների կարգավորման գործընթացը՚ թեմայով լսումների ժամանակ հայտարարեց տնտեսագետ, քաղաքական վերլուծաբան Անդրանիկ Թեւանյանը:

Դիմելով դահլիճում ներկա ՀՀԿ-ականներին, նա հարցրեց. «Ձեզ ինչ է եղել, էս ինչ օրն եք ընկել, էս ինչ քիրվայության քարոզ եք անում»,-ապա տեղեկացրեց, որ Հայաստանը պարտվելու է եւ այդ պարտության համար քաղաքական պատասխանատվությունը կրելու է Հանրապետականը:



ՀՀԿ-ականները բավականին վրդովվեցին, անգամ վիրավորական խոսքեր նետեցին դահլիճից, պատգամավոր Վազգեն Կարախանյանն անգամ ոտքի կանգնեց, դուրս եկավ նստած տեղից, ասես «հաշիվ պարզելու», սակայն կրքերը մի փոքր հանդարտվեցին, երբ Թեւանյանի ելույթը դահլիճն ընդունեց բուռն ծափահարություններով:

Ընդհանրապես, այսօրվա քննարկումն առանձնանում է շատ հետաքրքրիր միտումով: Առայժմ ելույթ ունեցած բոլոր պատվիրակները, որոնք կապ չունեն իշխանական կոալիցիայի հետ փաստարկված ներկայացնում են մտահոգությունները եւ խիստ քննադատում նախաստորագրված արձանագրությունները:

Նախկին հանրապետական Տիգրան Թորոսյանը հայտարարեց, որ այս պահին Թուրքիայի առաջ քաշած բոլոր նախապայմանները ընթացքի մեջ են այս երկու արձանագրություններով եւ Մադրիդյան սկզբունքներով. Էլ ի՞նչ նախապայման պետք է Թուրքիան առաջ քաշեր, եթե հնարավոր բոլոր զիջումները նախապայմաններն արդեն կատարվում են: Ապա «Ա1+»-ին Տիգրան Թորոսյանը ասաց ֆուտբոլային լեզվով. «Այս պահին հաշիվը 3-0 է հօգուտ Թուրքիայի, եւ խաղը մի դարպասի վրա է, ցավոք այդ դարպասն էլ դարպասապահ չունի»:

ՀՅԴ անդամ Վահան Հովհաննիսյանն էլ նկատելով, որ ՀՀ անկախության 3-րդ իշխանությունն աչքի է ընկնում ոչ միայն մերկ, կոշտ բացահայտ պրագմատիզմով, այլեւ ցինիզմով' գումարած անգրագետ դիլետանտիզմը բոլոր հարցերում , բայց այս անգամ քիթը վեր ցցած, որովհետեւ մի քանի անգլերեն ֆրազ են սովորել:

Նա հիշեցրեց հանրապետության վարչապետի բազմիցս արած հայտարարությունները, որ կառավարման համակարգում ահավոր անգրագիտություն է տիրում, ապա Սամվել Նիկոյանի ղեկավարած «Մարտի 1-ի» հանձնաժողովի եզրակացությունը, որտեղ խոսվում էր դատական եւ իրավապահ համակարգերի դիլետանտիզմի մասին. «Ինչո՞ւ եք կարծում, որ դիվանագիտական ասպարեզում այդ դիլետանտիզմը չկա, ես դրա ապացույցն ունեմ: Ինչո՞ւ մեզ հասցրին այս արձանագրություններին. Արդյո՞ք սպառված էին բոլոր ճանապարհները հասնելու միակ «ոգեշնչող երեւույթին»' ճանապարհի բացմանը»:

Կանադայում Հայաստանի նախկին դեսպան Արա Պապյանի ելույթը բավականին կոշտ էր եւ քննադատական եւ կրկին ընդունվեց բուռն ծափահարություններով;

«Մենք բոլորս կողմնորոշված ենք, եթե ելույթ ենք ունենում ժողովրդի համար, գնանք փողոց ելույթ ունենանք»,-առաջարկեց Գալուստ Սահակյանը: Նա էլ նկատեց, որ իրենք ունեն բավականին մտահոգություններ. «Դուք ունեք մտահոգություններ, մենք ունենք սարսափելի մտահոգություններ, բայց ունենք վճռականություն»,-ասաց Սահակյանը եւ արեց մի սենսացիոն հայտարարություն/ «Մենք բարիդրացիական հարաբերություններ չենք հաստատում Թուրքիայի հետ, դա հնարավոր չէ, մենք ուղղակի դիվանագիտական հարաբերություններ ենք հաստատում»:

Հանրապետական Վարդան Այվազյանն էլ հայտարարեց, թե հասկանում են, որ գործ ունեն տնտեսական մոնստրի հետ, եւ կանգնելու են լուրջ խնդիրների առաջ, բայց «կամ պետք է նստենք տեղներս մնանք, կամ փորձենք առաջ գնա, զարգանալ»: Նա նախընտրում է երկրորդը:

Ի դեպ, զարգացման առումով Անդրանիկ Թեւանյանը նկատեց, որ Թուրքիան երբեք թույլ չի տա, որ Հայաստանի տնտեսությունը զարգանա, խախտվի Ադրբեջանի հետ հավասարակշռությունը եւ արդյունքում Հայաստանը հաղթի սառը պատերազմում Ադրբեջանին. «Դա բացառվում է»,-ասաց Թեւանյանը: Քննարկումները շարունակվում են:

Նկատենք, որ ԱԺ նախագահ Հովիկ Աբրահամյանն իր ելույթում նկատեց, թե բավականին ուշ է նախաձեռնվել Սերժ Սարգսյանի հանդիպումը սփյուռքի հետ:


Աղբյուրը. Ա1+

Շարունակել կարդալ >>>
Leer mas >>>

«Կրկնում եմ՝ նախապայման չկա». ԱՄՆ պետքարտուղարի տեղակալը հայ-թուրքական հարաբերությունների մասին

Եվրոպայի և եվրասիական հարցերով ԱՄՆ պետքարտուղարի տեղակալ Ֆիլիպ Գորդոնը, ամփոփելով ԱՄՆ պետքարտուղար Հիլարի Քլինթոնի հանդիպումների արդյունքները Հայաստանի, Ադրբեջանի և Թուրքիայի արտգործնախարարների հետ, անդրադարձել է հայ-թուրքական հարաբերությունների կարգավորմանը, հայտնում է ԱՄՆ պետդեպարտամենտի պաշտոնական կայքը։

Խոսելով հայ-թուրքական Արձանագրությունների մասին՝ Ֆիլիպ Գորդոնը վերահաստատել է Միացյալ Նահանգների աջակցությունը տվյալ գործընթացին։
«Սա բարդ գործընթաց է, որն առերեսում է քաղաքական դիմադրություն երկու կողմերում էլ։ Եվ երբ մենք ասում ենք՝ դա պետք է կատարվի խելամիտ ժամկետներում, նկատի ունենք, որ մենք չենք ցանկանում տեսնել միմիայն գործընթացը, այլև դրա ավարտը։ Եվ ինչպես դուք գիտեք, Հայաստանի կառավարությունը երկար ժամանակ պնդել է, որ հայ-թուրքական հարաբերությունների բարելավումը պետք է լինի առանց նախապայմանների և խելամիտ ժամկետներում։ Դա իրենց կարծիքն է, ինչպես և մեր»,- մեկնաբանել է ԱՄՆ պետքարտուղարի տեղակալը։

Պատասխանելով այն հարցին, թե արդյոք «առանց նախապայմանների» ենթադրում է, որ հայերը որպես նախապայման առաջ չեն քաշում Ցեղասպանության հարցը, Ֆիլիպ Գորդոնը նշել է, որ առանց նախապայմանների նշանակում է «երկու երկրների կողմից էլ նախապայմանների բացակայություն»։

«Այս գործընթացի հետ կապելու շատ հարցեր կան, սակայն, մեր կարծիքով, հայ-թուրքական հարաբերությունների բարելավման գործընթացը, ըստ էության, շատ արժեքավոր է, և այն չպետք է հետաձգվի կամ կապվի այլ հարցերի հետ։ Այդ գործընթացը պետք է առաջ շարժվի»,- հայտնել է Ֆիլիպ Գորդոնը։

ԱՄՆ պետքարտուղարի տեղակալը նաև հավելել է, որ Հայաստանը, առանց Թուրքիայի հետ բաց սահմանի, մեկուսացած է։ «Վրաց-ռուսական պատերազմի ժամանակ մենք դրան ականատես եղանք։ Եվ Թուրքիայի հետ բարիդրացիական հարաբերությունների հաստատումը կարող է, հիրավի, պատմական զարգացում լինել, որը շահավետ կլինի երկու երկրների ժողովուրդների համար էլ։ Այն կնպաստի նրանց միջև առևտրային հարաբերությունների հաստատմանը ևս։

Հարցին, թե հայ-թուրքական հարաբերությունների բարելավումից ոչ մի կերպ «չի շահում Լեռնային Ղարաբաղի հիմնախնդիրը», Ֆիլիպ Գորդոնը նշել է, որ «մենք բազմիցս ասել ենք, և այժմ էլ կրկնում եմ՝ այս երկու հարցերի միջև ոչ մի կապ կամ նախապայման չկա»։

Թերթ.am

Շարունակել կարդալ >>>
Leer mas >>>

Ցեղասպանության փաստը հակառակն ապացուցելը ծիծաղելի է. Հայկ Դեմոյան

Այսօր ՀՀ նախագահ Սերժ Սարգսյանի հետ Համալիրում կայացած հանդիպմանը հայ–թուրքական Արձանագրությունների վերաբերյալ իրենց մտահոգություններն են արտահայտել Հանրային խորհրդի մի շարք անդամներ։ Մասնավորապես, մասնագիտորեն արտահայտվել և հարցեր է բարձրացրել Հայոց ցեղասպանության թանգարան–ինստիտուտի տնօրեն Հայկ Դեմոյանը։

Դեմոյանը մտահոգությունները ներկայացնելիս մատնանշել է Արձանագրություններում գործող սահմանների և Կարսի պայմանագրի հետ աղերսներ ունեցող դրույթները, որպես ամենահուզական կետ՝ նշել է պատմաբանների հանձնաժողովի ստեղծման մասին դրույթը։
«Հայոց ցեղասպանության հիմնահարցը գիտականորեն ուսումնասիրված, վավերացված, դրա իրավական, համեմատական և գիտական աստիճանը քննության և ուսումնասիրության այնքան խորն է, որ որևէ մեկ փորձ՝ ապացուցել հակառակաը կամ ինչ–որ մի արխիվում, ինչ–որ մի փոշոտ գզրոցում գտնել նոր փաստաթուղթ, որպեսզի ապացուցվի հակառակը, ուղղակի ծիծաղելի է»,– հայտարարել է Հայկ Դեմոյանը։

Շարունակելով՝ Դեմոյանը շեշտել է. «Կարող եմ Ձեզ վստահեցնել, որ թուրքական կողմի համար մենք ունենք բոլոր հնարքներն ու փաստարկները, որպեսզի կարողանանք ոչ միայն ընդդիմանալ, այլ նաև լուրջ, որոշակի խնդիրներ առաջադրել հակառակ կողմին»։

Թերթ.am

Շարունակել կարդալ >>>
Leer mas >>>

«Ինչո՞ւ եք մեզ զրկում հայրենիքից»

73-ամյա իրանահայ Մինաս Հայրապետյանը վերջին տարիներին ավելի հաճախ է լինում Երեւանում: Որպես հայ նա կարծում է, Հայաստանը նաեւ իր հայրենիքն է եւ ինքն էլ այստեղ իրավունքներ ունի: Հայ-թուրքական արձանագրությունների, եւ ընդհանրապես հայ-թուրքական հարաբերությունների վերաբերյալ հնչող տեսակետներում իրանահայը բազմաթիվ վիրավորական տարրեր է տեսնում: «Այսօր նույնիսկ Էրդողանն է իրեն իրավունք վերապահում խոսել մեր սփյուռքի մասին: Նույնը կրկնում են նաեւ մեր որոշ հայրենակիցներ' ասելով, թե ցեղասպանությունը սփյուռքի խնդիրն է: Հայրենիքովս եմ երդվում, այսօր հայ-թուրքական սահմանը բացվելու դեպքում' վտանգի է ենթարկվելու մեր ողջ ժողովուրդը»,- այսօր «Ա1+»-ին ասաց Մինաս Հայրապետյանը:
73-ամյա իրանահայը չի կիսում այն տեսակետը, թե այսօրվա Թուրքիան Օսմանյան Թուրքիայի իրավահաջորդը չէ, պատասխանատվություն չի կրում 1915թ. ցեղասպանության համար. «Ես զարմանում եմ, թե մարդիկ, ինչպես կարող մոռանալ ոչ վաղ անցյալ: Մեզ կոտորել են օրը ցերեկով' խաղաղ պայմաններում: Այսօր ինչպես կարելի է վստահել Թուրքիային: Այն պետությունները, որոնք այսօր մեզ կոչ են անում հարաբերություններ զարգացնել Թուրքիայի հետ, ինչպես կվարվեին նրանք մեր փոխարեն, եթե աչքի առաջ ցեղասպանություն ունենային: Ես դեմ եմ սահմանի բացմանը: Մենք մեր ոչնչացման սահմանն ենք բացելու: ԼՂ-ն են դրել այդ հարաբերություններում, հողեր տալուց են խոսում, թիզ հողից են խոսում, իսկ մեր երկիրը սանտիմետրի վրա է մնացել»:

Նրան վիրավորում են նաեւ այն տեսակետները, թե սփյուռքը Հայաստանին այլեւս տալու բան չունի. «Իմ միակ դստերս ավարտել է Երեւանի Կոմիտասի անվան կոնսերվատորիան: Ես ամբողջ կյանքում Իրանում աշխատել եմ նավթարդյունաբերությունում: Այսօր թոշակառու եմ եւ իմ թոշակը ես ծախսում եմ Հայաստանում: Սա նաեւ մեր սփյուռքահայերիս հայրենիքն է: Ինչու եք մեզ զրկում հայրենիքից»:

Աղբյուրը. Ա1+

Շարունակել կարդալ >>>
Leer mas >>>