Բարաք Օբամայի message–ը հայերին և թուրքերին

Միացյալ Նահանգների նախագահ Բարաք Օբաման երեկ երեկոյան հանդիպել է Հայաստանի և Թուրքիայի արտգործնախարարների հետ։ Հանդիպման ընթացքում նա պնդել է, որ երկու երկրների ղեկավարներն ավարտին հասցնեն երկկողմանի բանակցությունները՝ ուղղված հարևան երկրների կապերի վերականգնմանը։ Այդ մասին հաղորդում է թուրքական Hurriyet-ը։
Ուշագրավ է, որ Բարաք Օբաման իր ուղերձը հղել է անձամբ Թուրքիայի արտգործնախարար Ալի Բաբաջանին և Հայաստանի արտգործնախարար Էդվարդ Նալբանդյանին՝ հանդիպելով նրանց Ստամբուլում անցկացվող միջազգային ֆորումի համար նախատեսված հյուրասրահում։ Միջազգային փորձագետներն արդեն իսկ որակում են Օբամայի քայլը որպես «չափազանց լուրջ», իսկ երբեմն էլ «պատմական»։
Հիշեցնենք, որ «Քաղաքակրթությունների դաշինք» միջազգային ֆորումը նպատակաուղղված է արևմուտքի և մահմեդական երկրների միջև փոխըմբռնման խթանմանը։

«Բարաք Օբաման կոչ է արել Թուրքիային և Հայաստանին ներդնել իրենց ջանքերը երկու երկրների հարաբերությունները բարելավելու համար ու նաև հորդորել է կողմերին պաշտոնապես ավարտին հասցնել բանակցությունները և համաձայնության գալ քննարկվող հարցերի շուրջ»,- հայտարարել է Միացյալ Նահանգների բարձրաստիճան պաշտոնյան՝ ելույթ ունենալով Ստամբուլում լրագրողների առջև։


Թերթ.am

Շարունակել կարդալ >>>
Leer mas >>>

Գյուլը կրկին առաջարկում է հանձնաժողով ստեղծել

Ինչպես արդեն տեղեկացրել ենք, Միացյալ Նահանգների նախագահ Բարաք Օբաման Թուրքիայի նախագահ Աբդուլլա Գյուլի հետ պաշտոնական հանդիպումից հետո անդրադարձել է մի շարք կարևոր հարցերի, այդ թվում՝ Հայոց ցեղասպանության խնդրին։ Համատեղ մամուլի ասուլիսի ժամանակ ԱՄՆ նախագահը, անդրադառնալով տվյալ հարցին, նախ նշել է, որ չի փոխել իր տեսակետը, ապա հավելել, որ «ես այժմ ցանկանում եմ ուշադրությունը բևեռել ոչ թե իմ հայացքների վրա, այլ թուրք և հայ ժողովուրդների տեսակետների վրա։ Եթե նրանք կարող են առաջ շարժվել, ապա ամբողջ աշխարհը պետք է նպաստի դրան»։Աբդուլլա Գյուլը, իր հերթին, ասել է, որ ինքը պատրաստ է առերեսել պատմական իրադարձությունները և մեկ անգամ ևս կրկնել է իր երկրի առաջարկը՝ ձևավորել ակադեմիկոսներից և պատմաբաններից բաղկացած մի խումբ, ովքեր կզբաղվեն պատմական փաստերի ուսումնասիրությամբ։

«Այդ պատմական հարցերը բարձրացվել են օրակարգում քաղաքական հիմքերի հիման վրա և մեծամասամբ սփյուռքահայության կողմից, ովքեր ցանկանում են պահպանել իրենց ինքնությունը»,- կարծիք է հայտնել Թուրքիայի նախագահը։


Թերթ.am

Շարունակել կարդալ >>>
Leer mas >>>

Բարաք Օբաման խոսել է հայ–թուրքական հարաբերությունների և ղարաբաղյան հիմնախնդրի մասին

ԱՄՆ նախագահ Բարաք Օբաման Թուրքիա կատարած այցի շրջանակներում այսօր խոսել է երկրի խորհրդարանի առջև։
Իր 45-րոպեանոց ելույթում ԱՄՆ նախագահն անդրադարձել է նաև հայ–թուրքական հարաբերություններին։
Օբաման, մասնավորապես, նշել է, որ յուրաքանչյուր երկիր պետք է կարողանա հաղթահարել իր անցյալը և, ամփոփելով տեղի ունեցածը, առաջ շարժվել։

«Անցյալի չլուծված հարցերը կարող են ծանր բեռ դառնալ։ Յուրաքանչյուր երկիր պետք է կարողանա լուծել անցյալի խնդիրները։ Միայն անցյալի արդյունքներն ամփոփելը կարող է ավելի լավ ապագայի համար նախադդրյալներ ստեղծել։ Ես գիտեմ, որ այս դահլիճում հստակ ձևավորված կարծիքներ կան 1915թ. սարսափելի իրադարձությունների վերաբերյալ։ Թեև այս հարցում իմ դիրքորոշման վերաբերյալ էլ բազմաթիվ մեկնաբանություններ գոյություն ունեն, ես գիտեմ, որ սա հայերի և թուրքերի խնդիրն է՝ «աշխատել» անցյալի հետ։ Թուրք և հայ ժողովուրդների համար առաջ շարժվելու միակ ճանապարհը անցյալի հետ գործ ունենալու ազնիվ, թափանցիկ և կառուցողական մթնոլորտի ստեղծումն է։

Մենք արդեն ականատես եղանք Թուրքիայի և Հայաստանի առաջնորդների կողմից ձեռնարկած պատմական քայլերին։ Այս շփումները նոր էջ են խոստանում երկու երկրների հարաբերություններում։ Սահմանի բացումը կհանգեցնի հայ և թուրք ժողովուրդների խաղաղ և բարեկեցիկ գոյակցությանը, որը դրականորեն կանդրադառնա երկու երկրների վրա։ Դրա համար էլ Միացյալ Նախանգները լիովին սատարում են Թուրքիայի և Հայաստանի միջև հարաբերությունների լիարժեք կարգավորումը», – ասել է ԱՄՆ նախագահը։

Օբաման խոսել է նաև Թուրքիայի դերի մասին ղարաբաղյան հիմնախնդրի կարգարորման հարցում, մասնավորապես, նշելով, որ Թուրքիան տարածաշրջանի այն երկիրն է, որը կարող է «խաղաղ» և լավ հարաբերություններ հաստատել Հարավային Կովկասի բոլոր ժողովուրդների հետ։ Ըստ ԱՄՆ նախագահի՝ Թուրքիան կարող է կառուցողական դեր խաղալ ղարաբաղյան հիմնախնդրի կարգավորման հարցում, որը «չափազանց երկար է տևում»։

Շարունակել կարդալ >>>
Leer mas >>>

Օբաման չի փոխել իր կարծիքը Հայոց Ցեղասպանության իրողության վերաբերյալ

Միացյալ Նահանգների նախագահ Բարաք Օբաման այսօր Անկարայում պաշտոնական հանդիպում է ունեցել Թուրքիայի նախագահ Աբդուլլա Գյուլի հետ։ Ինչպես հայտնում են թե՛ թուրքական, թե՛ ամերիկյան լրատվամիջոցները, Բարաք Օբաման իր գործընկերոջ հետ հանդիպումից հետո մամուլի ասուլիսի ժամանակ հայտարարել է, որ Հայոց ցեղասպանության շուրջ իր դիրքորոշումն անփոփոխ է մնում։

Ինչպես մեջբերում է Օբամայի խոսքերն AP-ը, ԱՄՆ նախագահը հայտարարել է, որ նա հավատարիմ է իր՝ 2008թ. հնչեցրած այն համոզմունքին, որ Օսմանյան կայսրության թուրքերը 20-րդ դարի սկզբին հայերի զանգվածային կոտորածներ են իրականացրել։ Սակայն այս անգամ Օբաման նման զգայուն թեմայի շուրջ Թուրքիայում խոսելիս՝ առավել աչալուրջ է գտնվել՝ չկրկնելով «ցեղասպանություն» բառը, հայտնում է AP–ը։

«Դե ինչ, իմ տեսակետը հայտնի է, և ես չեմ փոխել իմ դիրքորոշումը»,- հայտարարել է այսօր ԱՄՆ նախագահը՝ ելույթ ունենալով Աբդուլլա Գյուլի հետ համատեղ մամուլի ասուլիսի ժամանակ։
Հիշեցնենք, որ 2008թ. նախընտրական քարոզարշավի շրջանակներում Բարաք Օբաման իր պաշտոնական կայքում հայտարարություն էր զետեղել առ այն, որ «Հայոց ցեղասպանությունը մեղադրանք չէ, անձնական կարծիք չէ, այլ իրողություն, որի մասին վկայում են բազմաթիվ պատմական փաստեր»։ Օբամայի կայքում գրված էր, որ «Միացյալ Նահանգները արժանի են ունենալ մի առաջնորդ, ով ճիշտն է ասում Հայոց ցեղասպանության մասին։ Ես մտադիր եմ լինել այդ նախագահը»։

Իսկ այսօր Օբաման, չհրաժարվելով իր խոստումից, նույնությամբ չի կրկնել 2008թ. խոսքերը, բայց և չի հրաժարվել դրանցից։ Հավանաբար, նա նրբանկատ է գտնվել այն պատճառով, որ գտնվում էր Թուրքիայի մայրաքաղաքում։ Մասնավորապես, ԱՄՆ նախագահը գովեստի խոսքեր է հնչեցրել Աբդուլլա Գյուլի՝ Հայաստանի և Թուրքիայի հարաբերությունների բարելավման գործընթացում ակտիվ մասնակցության առնչությամբ։ Նա նշել է, որ Գյուլի ցանկությունը «լուծել երկար տարիների հարցերը» գովելի է։

Օբաման ասել է, որ նա ցանկանում էր նպաստել այդ բանակցությունների զարգացմանը, այլ ոչ թե հրահրել դրանք՝ հօգուտ մի կողմի։ «Եթե երկու կողմերը կարող են առաջ շարժվել և լուծում գտնել խրթին և ողբերգական պատմության շուրջ, ապա ես կարծում եմ՝ ողջ աշխարհը պետք է նպաստի դրան»,- նշել է Օբաման։
Հայոց ցեղասպանության հարցից զատ՝ երկու երկրների նախագահները քննարկել են մի շարք ռազմավարական կարևորության հարցեր։ Համատեղ մամուլի ասուլիսի ժամանակ Աբդուլլա Գյուլը հայտարարել է, որ Թուրքիան և Միացյալ Նահանգները միասին են աշխատել տարբեր հարցերի շուրջ։

Ինչպես պարզ է դարձել հանդիպումից հետո, թուրքական կողմն առավել շատ ցանկանում է, որպեսզի երկու երկրների համատեղ ջանքերն ուղղվեն «Քուրդիստանի աշխատավորական կուսակցության» դեմ պայքարին, Կիպրոսի հակամարտության հարցում լուծում գտնելուն, ինչպես նաև Միացյալ Նահանգների՝ Հայոց ցեղասպանությունը ճանաչելու դեպքում հնարավոր խնդիրների լուծմանը։

Ամերիկյան կողմի համար գլխավոր թեմաներից է եղել Թուրքիայի աջակցությունը Իրաքից զորքերի դուրս բերման հարցում, ինչպես նաև Աֆղանստան-Պակիստան հակամարտությունը, էներգետիկ դիվանագիտությունը, Իրանը և առավել ամուր անդրատլանտյան հարաբերությունները։

Բարձրաստիճան ամերիկացի պաշտոնյաներից մեկը նշել է, որ «Թուրքիայի խորհրդարանում ԱՄՆ նախագահը կհաստատի, թե Թուրքիան ինչպիսի առանցքային դաշնակից է իր երկրի համար, ինչպես նաև Եվրոպայի կարևոր մասնիկ»։
Հիշեցնենք, որ Բարաք Օբաման սկսել է իր պաշտոնական այցը Թուրքիա Մուստաֆա Քեմալ Աթաթուրքի դամբարան կատարած այցելությունից, որտեղ նա ծաղկեպսակ է դրել և հարգանքի տուրք է մատուցել ժամանակակից Թուրքիայի Հանրապետության հիմնադրին։

«Լինելով Միացյալ Նահանգների 44-րդ նախագահը՝ ես ձգտում եմ բարելավել հարաբերությունները ԱՄՆ-ի և Թուրքիայի միջև»,- նշել է Օբաման՝ հույս հայտնելով, որ համերաշխություն կլինի ամենուրեք։


Թերթ.am

Շարունակել կարդալ >>>
Leer mas >>>