Դավութօղլուն դեմ է Թուրքիայից հայերին վտարելուն

Վտարել Թուրքիայում ապօրինի բնակվող Հայաստանի քաղաքացիներին` նշանակում է հաղթաթուղթ տալ Թուրքիային դեմ հանդես եկող երկրներին: Այս մասին, Sabah օրաթերթի փոխանցմամբ, Թուրքիայի Ազգային մեծ ժողովի Արտաքին հարաբերությունների հանձնաժողովում տեղի ունեցած դռնփակ նիստի ժամանակ հայտարարել է արտգործնախարար Ահմեթ Դավութօղլուն` ի պատասխան Ժողովրդա-հանրապետական ընդդիմադիր կուսակցության անդամ պատգամավոր Ջանան Արըթմանի` ապօրինի բնակվող հայաստանցիներին Թուրքիայից վտարելու առաջարկությանը:«Նման քայլը հաղթաթուղթ կդառնա մեր դեմ հանդես եկող երկրների ձեռքին: Բացի այդ, աշխարհի բոլոր երկրների թերթերը կհրապարակեն վտարվող հայերի մասին նյութեր: Կձևավորվի ցեղապաշտական պատկեր, Թուրքիան ավելի դժվարին իրավիճակում կհայտնվի»,- հայտարարել է Դավութօղլուն:

Իսկ ի պատասխան խորհրդարանից հայ-թուրքական Արձանագրությունները հետ կանչելու ընդդիմության պահանջին` Դավութօղլուն նշել է, որ այդ քայլը ճիշտ չի լինի:

«Արձանագրությունների հետ կանչելը ճիշտ չի լինի: Ըստ էության, նման նպատակ էլ չունենք: Արձանագրությունները մեր ձեռքին շատ կարևոր գործիք և լծակ են: Մենք դրանք օգտագործում ենք որպես արգելակ»,- ասել է Թուրքիայի ԱԳՆ ղեկավարը:

Թուրքիայի արտաքին քաղաքական գերատեսչության ղեկավարը դեմ է արտահայտվել նաև ամերիկյան Ինջիրլիք ռազմակայանը փակելու ընդդիմության առաջարկությանը` հայտարարելով, թե նման քայլն այսօրվա փոփոխված քաղաքական կոնյունկտուրայի պայմաններում որևէ ազդեցություն չի կարող ունենալ:

Թերթ.am