Կոնգրեսական Սթիվեն Կոենը դուրս հրավիրեց լրագրողին մամլո ասուլիսից հայոց Ցեղասպանության մասին հարցի համար

Մեմֆիսցի կոնգրեսական Սթիվ Կոենը իր մամլո ասուլիսի ընթացքում դուրս հրավիրեց լրագրող Պիտեր Մուսուրլյանին, որը կոնգրեսմենին խնդրեց բացատրել Հայոց ցեղասպանության մասին օրինագծի ընդունմանն իր ցուցաբերած դիմադրության պատճառը: Այդ մասին PanARMENIAN.Net-ին հայտնել է Ամերիկայի Հայ Դատի Հանձնախումբը (ANCA):

«Հայոց ցեղասպանության մասին օրինագծի ընդունմանն ուղղված դիմադրության վերաբերյալ փաստեր հավաքել փորձող լրագրողին մամլո ասուլիսից դուրս հրավիրելը Կոնգրեսի ներկայացուցչի կողմից խուլիգանական արարք է»,-հայտնել է ANCA-ի գործադիր տնօրեն Արամ Համբարյանը:

Բուրբանկի (Կալիֆորնիա) հանրային հեռուստատեսությունում աշխատող Պիտեր Մուսուրլյանը Կոենից հարցազրույց էր փորձում վերցնել դեռեւս նախորդ շաբաթ. այդ հարցում նա մերժվել էր: Լրագրողը ձգտում էր Սթիվ Կոենի հետ զրուցելու հնարավորություն գտնել, բայց նրա ջանքերը չարդարացվեցին, եւ Կոենի նստավայրում տեղի ունեցող մամլո ասուլիսի ժամանակ կոնգրեսմենը Մուսուրլյանից պահանջեց հեռանալ սենյակից: Մամլո ասուլիսի ընթացքում կոնգրեսականը, ծայրահեղ կոպիտ անդրադառնալով Մուսուրլյանի հայկական ծագմանը, կրկին հայտնեց Հայոց ցեղասպանության օրինագծի ընդունման դեմ իր պայքարի մասին:

ԱՄՆ Կոնգրեսի 106-րդ բանաձեւը ներկա պահին սատարում են 219 կոնգրեսականներ: 2007թ. հոկտեմբերի 10-ին բանաձեւը արժանացավ ԱՄՆ Ներկայացուցիչների պալատի արտաքին հարաբերությունների կոմիտեի հավանությանը: Կոնգրեսմեն Կոենը բանաձեւի ընդունման հակառակորդներից մեկն էր: «Ցեղասպանությունը պետք է դատապարտվի ամբողջ աշխարհի կողմից, անկախ նրանից, թե երբ եւ որտեղ է իրագործվել: Կոնգրեսմեն Կոենի՝ Հայոց ցեղասպանության հարցում ցուցաբերած դիմադրության հետ կապված հարց է առաջանում. իսկ ո՞ր ցեղասպանության ճանաչմանն է նա դիմադրելու վաղը»,-նկատել է Արամ Համբարյանը: