Google-ը հեռանում է Չինաստանից

Երեկ Google ընկերությունը հայտարարել է, որ այն կլքի Չինաստանը` վերջինիս կառավարության կողմից իրականացվող գրաքննության և իր սերվերի վրա իրականացված հաքերային հարձակումների պատճառով։ Անցած շաբաթվա ընթացքում ամերիկյան 34 կազմակերպություններ ենթարկվել են չինական հաքերների հարձակումներին:Ընկերության կարծիքով` հաքերների հարձակումների նպատակներից մեկը եղել է չինական այլախոհների էլեկտրոնային փոստերի գաղտնաբառերի բացահայտումը։
Google-ի մյուս մտահոգությունը Չինաստանում գործող ինտերնետային գրաքննությունն է, որը ոչ մի կերպ չի տեղավորվում ընկերության արժեքային համակարգի մեջ։ Մասնավորապես, Չինաստանում արգելված է Google-ին պատկանող YouTube կայքը։

Չնայած համաշխարհային շուկայում Google-ը միանշանակ առաջատար է, այնուամենայնիվ չինական շուկայում այն զիջում է տեղական Baidu որոնման համակարգին, որը սերտ կապերի մեջ է Չինաստանի կառավարության հետ։ Սակայն, շատ փորձագետների կարծիքով, եթե Google-ը այսօր հեռանա չինական շուկայից, երկարաժամկետ կտրվածքում այն կարող է զգալիորեն թուլացնել ընկերության դիրքերը համաշխարհային շուկայում։


Թերթ.am