Փոխադարձության սկզբունքով` Հայաստան առանց վիզայի կարող է մուտք գործել երեսուն երկրի քաղաքացի

Առանց վիզայի Հայաստան կարող է մուտք գործել երեսուն երկրի քաղաքացի. գործում է փոխադարձության սկզբունքը։ ՀՀ ԱԳՆ մամուլի և տեղեկատվության վարչությունից տեղեկացրեցին, որ քսան երկրի (Արգենտինա, Բրազիլիա, Բուլղարիա, Չինաստան, Խորվաթիա, Կիպրոս, Հունգարիա, Հնդկաստան, Իրան, Լատվիա, Լիտվա, Մեքսիկա, Մոնտենեգրո, Լեհաստան, Ռումինիա, Սերբիա, Սինգապուր, Սլովակիա, Թուրքմենստան, Ուրուգվայ) քաղաքացիների թույլատրվում է առանց վիզայի մուտք գործել միայն դիվանագիտական, պաշտոնական կամ ծառայողական անձնագրերով։Տասը երկրի (Ադրբեջան, Բելառուս, Վրաստան, Ղազախստան, Ղրղզստան, Մոլդովա, Ռուսաստան, Տաջիկստան, Ուկրաինա, Ուզբեկստան) քաղաքացի կարող է այցելել Հայաստան բոլոր տեսակի անձնագրերով։ Ադրբեջանի և Սինգապուրի դեպքում մուտքի արտոնագրի տրամադրման կարգը գործում է հատուկ (ad hoc) դեպքերում և հիմնված չէ որևէ երկկողմ համաձայնության վրա։ Այլ ազգային անձնագրեր և փաստաթղթեր ունեցող անձինք, ներառյալ` ՄԱԿ-ի «Laissez-passer», պետք է ստանան ՀՀ մուտքի արտոնագիր։

Սփյուռքահայերը ՀՀ մուտքի արտոնագիր ստանալու համար դիմում են ընդհանուր կարգով, սակայն նրանց համար նախատեսված է ՀՀ կացության հատուկ կարգավիճակ, որը շնորհվում է ՀՀ նախագահի կարգադրությամբ։ Կացության կարգավիճակի անձնագիրը տրվում է 10 տարի ժամկետով, հետագա երկարաձգման հեռանկարով։ Դրանով սփյուռքահայերը կարող են առանց ՀՀ մուտքի արտոնագիր ստանալու մուտք գործել Հայաստան։ Ի դեպ, Ցեղասպանություն վերապրածներին այս կարգավիճակը շնորհվում է անվճար։

Ըստ ՀՀ ոստիկանության անձնագրերի եւ վիզաների վարչության` այն պետությունների քաղաքացիները, որոնց հետ Հայաստանն աշխատում է ոչ վիզային համակարգով, հանրապետությունում առանց մուտքի արտոնագրի կարող են բնակվել մինչև 90 օր մեկ տարվա ընթացքում, որից հետո նրանք պարտավոր են կամ հեռանալ երկրից, կամ դիմել անձնագրերի և վիզաների վարչություն` ստանալու բնակության իրավունք։ Այն անձինք, ովքեր Հայաստանում ունեն ՀՀ քաղաքացի հանդիսացող հայր, մայր, կին, ամուսին, զավակ, ազատվում են ՀՀ-ում կացության կարգավիճակ ստանալու համար պետական տուրքերից` բացառությամբ կացության հատուկ կարգավիճակից։


/Արմենպրես/